निको खबर 
बैतडी – (चलनै हरायो)
कुन्ठा बसि मुन्टो कोद्दे ,चलनै हरायो।
नजाणेको बुढा सोद्दे, चलनै हरायो।।
मौ जौ बसि घरेउल् गद्दे ,चलनै हरायो।
तम्या फोला पानी भद्दे, चलनै हरायो।।
मेरा बाबा ईजा भुण्ण्या,चलनै हरायो।
बुढान् कि अर्ति सुण्ण्या, चलनै हरायो।।
बार् पाटे घागरो लाउने , चलनै हरायो।
ठाडि भाका डेउडा गाउने, चलनै हरायो।।
चाँदी बाला पोती लाउन्या ,चलनै हरायो।
चुला खान्या धोती लाउन्या, चलनै हरायो।।
चुलठि मा डोरी बाट्ट्या,चलनै हरायो।
नुन शीत कोदो साट्ट्या चलनै हरायो।।
चिट्ठी मा रैवार दिन्या ,चलनै हरायो।
चिठा मा नउ बार लिन्या,चलनै हरायो।।
घोडा चडी बेउलो हुन्या, चलनै हरायो।
डोलि चडि बेउलि रुन्या ,चलनै हरायो।।
बाजा बजाई छलो खेल्ल्या, चलनै हरायो।
लिखु लगाई कोलु पेल्ल्या , चलनै हरायो।।
अगेठीउन मुडा बाल्ल्या ,चलनै हरायो।
सिला पिसि माणा हाल्ल्या ,चलनै हरायो।।
जनई हाल्ले जुणि राख्दे, चलनै हरायो।
गाईको गौंत् जमानि् चाख्दे,चलनै हरायो।।
भैंसा लैझाई लेक झान्या ,चलनै हरायो।
घिउ दूध धिनालि खान्या चलनै हरायो।।
बज्जैन भैंसिको घाणो,चलनै हरायो।
मिल्लैन कोदा को माणो, चलनै हरायो।।
यश डाेट्याली रचनाका रचनाकार केशव साउद हुन् ।उनी बैतडीकाे सुर्नया गाउँपालिका ८ कठमडा मट्टेका हुन् । हाल उनी राेजगारीकाे सिलसिलामा भारतकाे अम्बलामा छन् ।
प्रतिक्रिया दिनुहोस्